ماهي الخطوات المتبعه للعمل كطبيب بدوله الامارات العربيه ؟؟

Mhmdabdelnour
Few Steps
Few Steps
Posts: 6
Joined: 09 Sep 2013, 13:26
University: Omdurman Islamic University
Degree (College): MBBS
Graduation Year: 2013
Plan \ Working On: MRCS
Working on (2): PLAB
Speciality: General Surgery
Job Title: House Officer (intern)
Work Place: N/A
Has thanked: 0
Been thanked: 3 times
Contact:

ماهي الخطوات المتبعه للعمل كطبيب بدوله الامارات العربيه ؟؟

Unread post by Mhmdabdelnour »

للعمل كطبيب عام بدوله الامارات العربيه المتحده عليك الحصول على احد التراخيص الثلاثه: الوزاره - هيئة دبي - هيئة ابوظبي



ساشرح طريقة التقديم حسب خبرتي المحدوده في هذا المجال .. متنمي لكم التوفيق .

ترخيص الوزاره : يتم عبر جلوسك لامتحان الوزارة اولا :

الخطوه الاولى :
التقديم اون لاين عبر الموقع :
http://www.moh.gov.ae/ar/Pages/default.aspx

تخت الماوس فوق (الخدمات الالكترونيه ) من غير ماتعمل كليك بيظهر خيار تقييم الاطباء والفنيين تعمل عليهو كليك
يستحسن القاء نظره على (متطلبات الطبيب العام )
http://www.moh.gov.ae/ar/Highlights/Doc ... %20GPs.pdf

ملاحظه : منقوووول للفائده

عشان تقدم للامتحان لازم اول تعمل حساب شخصي عشان تقدم من خلالو .. ودا لما تعمل كليك على ( نظام التقييم ) في نفس الصفحه
http://pml.moh.gov.ae/evaluation/Pages/MainPageAR.aspx

برضو في حته ممكن تشوف منها المستندات المطلوبه ..متطلبات و شروط تقديم طلبات التقييم و الإمتحانات بوزارة الصحة للممارس العام

ودي لما تعمل كليك فوق كلمة الاطباء في المربعات الصفراء المتحركه اسفل الصفحه .

عشان تعمل حساب تعمل كليك فوق : انقر هنا للتسجيل
تعمل حساب وفيهو حترفع كل شهاداتك ومستنداتك المطلوبه ..


(مااااااااااتعمل سبميت مالم ترفع كل المطلوبات )
**********************************
الخطوه التانيه :
الدفع اون لاين في حسابك على الموقع .

لو في اي مشكله بتجيك في الايميل ,

*** بعدداك في ناس بيطلبو منهم يرسلو صورة من الشهادات وناس لا.. ماعارفه الاختلاف سرو شنو .


بعدها بيوم تقريبا حيجيك في ايميلك رقم بتسجل بيهو في موقع البرومترك
https://securereg3.prometric.com/
ممكن تسجل بيهو في نفس اليوم .

بعد الامتحان مباشرة بتظهر النتيجه وبيدوك افاده بالنجاح .. وبعد اسبوعين تلاته بيطلع التقييم.
التقييم حسب سنين الخبره :
من كانت خبرته خمسه سنوات فما فوق بعد الامتياز يقيم ك
Full GP
من كانت خبرته اقل من خمسه سنوات بعد الامتياز يقيم ك
Starting GP
الفرق في فرص العمل والمرتب ..

ممكن اي زول يمشي يستلم ليك التقييم( بتجيك رساله في الايميل لما يطلع ) وبتلقى تغيير في الاستيتس في حسابك في الموقع برضو)


&&&&&&&&&&&&&&&&&&&&&&&&&&&&&&&&&&&&&&&&

في حاجات ثابته في كل التقديمات :

اخر خبره عندك ماتكون قبل اكتر من سنه .. ( الخبره مش الشهاده)
اي شهادة قود استاندنق ماتكون طالعه قبل اكتر من 3 شهور
بالنسبه للناس الفي السعوديه ماممكن تطلعو شهادة خبره وانتو لسه قيد العمل لكن ممكن تطلعو شهادة تعريف اداريه من شئون الموظفين او الشئون الصحيه - اي ورقه فيها مايفيد انو فلان الفلاني يعمل بوظيفة كذا من يوم كذا الى كذا وهذا لمن يهمه الامر
وختم رسمي
وخلاص

احيانا بيتثاقلو في دي ذاتها .. المهم اتحرفنو واتشفتنو وكضبو وامرقو بشهادة تعريف عشان تنضاف للخبره بتاعتكم ومايكون في قاب بين اخر شغل في السودان وزمن التقديم

&&&&&&&&&&&&&&&&&&&&&&&&&&&&&&&&&&&&&&&&&&

ثانياً :ترخيص دبي
DHA= Dubai health authority
المستندات المطلوبه نفس بتاعة امتحان الوزاره + شهادة من الداتا فلو
.. لو عندك واحده جديده بترفقها ولو ماعندك بتدفع الف درهم زيادة عشان يعملوها ليك
الداتا فلو لمن لايعرفها هي شركة التحقق من صحة شهاداتك المرفقه .


الخطوه الاولى : التقديم

اون لاين ومعقد الى حد ما .. وياريت الناس العندها رغبه تمتحن قريب تتابع خطوه بخطوه وتستكشف المكان ((لانو البجي يسالني بعد شهر وشهرين والله غير الجلد ماعندي ليهو شي .. ))الله يلمني فيهو بس

الموقع :
http://www.dha.gov.ae/EN/Pages/default.aspx

اعلى يمين الصفحه تعمل كليك على
LicensingServices

تعمل تسجيل ك
New user
ادني يمين الصفحه .

في الموقع دا لو اكتشفت انك في حاجه مامجهزها او قررت تطلع لاي سبب من الصفحه تعمل
save
في الحته الانت واقف فيها عشان لما تدخل المره الجايه ماتبدا من الاول لانو المشوار ببقى طويل .

المهم .. بعد التسجيل كمستخدم جديد بتعمل لوق ان .. ورجاءا استعملو اسماء وكلمات يسهل عليكم تذكرها .
بعدما تعمل لوق ان .. بتفتح صفحه بدايتها
DHA Service Start Page
تعمل كليك على
Individual home
بعدها كليك على
Health Regulation Service
*** قبل ماتتجاوزو الصفحه دي وتعملو الكليك في خيار ممكن من خلالو تعرفو الشهادات المطلوبه شنو .. من خلال اختيار
Rules & regulations
وبعدها
Healthcare Professionals Regulations
وبعدها
Physician
وبعدها
General practitioner


نرجع للصفحه الفيها هيلث رقيوليشن سيرفيس ديك .. بعد الكليك تختار

Professional License
وتدخل تملى البيانات المطلوبه وتواصل رحلة التقديم ..

طبعا مافي تخصصات .. في مكان التخصصات بتكتب
General practitioner or GP

والله يقويكم ..

بعد رفع المستندات المطلوبه وآخر سبميت لاخر صفحه بيجي الدفع .. والحمدلله هنا اون لاين بفيزا كارد ..


بعدها الانتظار لفتره مابين اسبوعين لاربعه اسابيع.. لو في اي شهادة ناقصه او شي غلط في بياناتك برسلو ليك مسج في حسابك في الموقع.. يعني لازم كل يوم تتفقد حسابك عشان ماتعطل روحك .
بعدها برسلو ليك في ايميلك رقم
Eligibility number
تسجل بيهو في موقع البرومترك .

الرقم ماببقى
Active
الا بعد 5 ايام .

بعدماتمتحن وتنجح -باذن الله - النتيجه بعد يومين الى خمسه ايام .. بتجيك النتيجه في حسابك في الموقع.. الصفحه عنوانها
Eligibility letter
بتعمل ليها برنت اوت وتلصقها في السي في وتقدم بيها عادي .. يعني كافيه للتقديم.. والترخيص بتتطلو ليك المستشفى الحتشتغل فيها برضو.

ترخيص دبي بشغلك في امارةدبي حكومي وخاص .. فرص الحكومي ضيقة جدا .

لكن بعد ماتشتغل في دبي لمدة سنه ممكن ترخيصك دا ذاتو يشغلك في ابوظبي .. يعني من غير ماتمتحن الهاد
وفي ناس قالوا 6 شهور .. الله اعلم


&&&&&&&&&&&&&&&&&&&&&&&&&&&&&&&&&&

ثالثاً: ترخيص ابوظبي
HAAD= Health autherity of Abu Dhabi

للاسف معلوماتي قليله لاني قدمت بنظام وهسه في نظام جديد .

التقديم اون لاين ونفس المستندات المطلوبه في الامتحانين الآخرين

الموقع :
http://www.haad.ae/HAAD/Default.aspx?al ... ae/haad/ar

كليك على مقدمو الرعاية الصحيه
http://www.haad.ae/haad/ar/tabid/803/Default.aspx

الخدمات والمتطلبات
http://www.haad.ae/HAAD/tabid/808/Default.aspx

متطلبات التاهيل الشخصي

http://www.haad.ae/HAAD/LinkClick.aspx? ... &tabid=927

بتنزل وبتتحفظ في اللابتوب ولازم تلقي عليها نظره قبل ماتقدم .

تعمل باك وتعمل كليك على التراخيص
وبعدها على تراخيص مقدمو الرعاية الصحية

وبعدها طلب ترخيص للاطباء
http://www.haad.ae/HAAD/tabid/1075/Default.aspx

وتعمل حساب في الموقع وتبدا رحله مايعلم بيها الا ربنا من هنا
http://dataflowgroup.com/HAAD/Login.aspx
دي الصفحه بتاعة الداتا فلو .. اللي هي المرحله الاولى من التقديم .

لحدي هنا انا معرفتي في الموقع انتهت لانو النظام اختلف شويه .. لكن حتلقو بيانات مفروض تتملي عن طريق انكم تعملو برنت اوت لاربعه ورقات وتملو البيانات وترفعوهم تاني بالاسكانر .. اتنين منهم وثائق تعارف .. بيانات شخصيه بالعربي والانجليزي و اتنين كدا مافاهمه فايدتهم شنو لكن تملوهم وترفعوهم برضو وتكلمو التقديم وتنسو الفكره .

بعد كم شهر بتطلع افادة الداتا فلو .. ويتم تحويلك لموقع امتحان الهاد عشان تقدم ليهو
افادة الداتافلو قد تستغرق 4-6 شهور او اكثر .. والموافقه على الامتحان (بعد التقديم ) لا قيود لها .. يعني مفتوحه ..تلاته شهور .. سته شهور .. سنه .. سنتين .. المهم وقت مايقول ليك تعال تمشي تمتحن .

.. ترخيص الهاد بشغلك في ابوظبي والعين حكومي وخاص

باقي التفاصيل لاعلم لي بها لاني ماوصلت مرحله الامتحان ليوم الليله وشكلي صارفه النظر عنو .

&&&&&&&&&&&&&&&&&&&&&&&&&&&&&&&&&&&&&&
بالنسبه لمصادر المذاكره والاستعداد للامتحان :

امتحان دبي والوزاره تابعين لنفس الشركه - البرومترك- وهما متشابهان في المحتوى .

اهم مصدرين: مذكرة الالف و4 سؤال او مذكرة القصيم

ومذكرة
Pretest
فاميلي مديسن

في ناس بقرو من بقية كتب الفاميلي مديسن لكن انا وغيري كثيرين اكتفيت بالمذكرتين اعلاه

لو الواحد قرا البري تيست وبعديها مر على اسئلة مذكرة الالف سؤال وقرا المواضيع الكبيره بتركيز بينجح لامحاله .



بالنسبه لامتحان ابوظبي :
كل مايخص
Step 2 -USMLE -KAPLAN -Q BOOK . Q BANK
والامتحان ماااااهين .
&&&&&&&&&&&&&&&&&&&&&&&&&&&&&&&
الموضوع يحتمل الاضافات من كل من لديه خبره عمليه او سماعيه ..
اقول قولي هذا واستغفر الله لي ولكم .. متمني منه تعالى التوفيق والسداد للجميع .
Last edited by Mhmdabdelnour on 18 Sep 2013, 01:46, edited 1 time in total.
These users thanked the author Mhmdabdelnour for the post (total 3):
Waleed Fareedmohammed09113Wissam Elmalik
khalidsanhoory
Donor
Donor
Posts: 9
Joined: 08 Jul 2013, 18:34
University: Shendi University
Degree (College): MBBS
Graduation Year: 2007
Plan \ Working On: MRCP
Speciality: General Medicine
Job Title: SHO (Medical or Resident)
Work Place: Alaweqila PHC-Arar-KSA
Has thanked: 1 time
Been thanked: 0
Contact:

Re: ماهي الخطوات المتبعه للعمل كطبيب بدوله الامارات العربيه

Unread post by khalidsanhoory »

شكرا ليك كتير علي المجهود
لكن عندي ليك سؤال
من وين اقدر انزل المزكرات الذكرتها في البوست اعلاه؟؟؟
واسمائها شنو عشان الواحد يقدر يفتش عليها
ولكم مني جزيل الشكر
obai
Going Well
Going Well
Posts: 12
Joined: 11 Mar 2011, 18:59
University: Juba University
University & College: juba university _ college of medicine
Country & City: sudan
Degree (College): MBBS
Graduation Year: 2002
Post-Graduation: MRCPCH
Plan \ Working On: Other
Working on (2): ----
Speciality: -----
Job Title: Specialist
Work Place: alhawraa hospital _ KSA
Has thanked: 1 time
Been thanked: 2 times
Contact:

Re: ماهي الخطوات المتبعه للعمل كطبيب بدوله الامارات العربيه

Unread post by obai »

)ياخى الموضوع جهد شخصي لزميلة و منشور فى عدد من قروبات الفيسبوك , ارجو الاشارة و لو بكلمة (منقول
حفظا للحقوق الادبية
These users thanked the author obai for the post (total 2):
SudaMediCaWaleed Fareed
Joy
Active Member
Active Member
Posts: 37
Joined: 11 Feb 2013, 12:11
Job Title: SHO (Medical or Resident)
Has thanked: 11 times
Been thanked: 8 times
Contact:

Re: ماهي الخطوات المتبعه للعمل كطبيب بدوله الامارات العربيه

Unread post by Joy »

في تغييرات حصلت بالنسبة لامتحان الهاد وهي انو بيلغو ليك التسجيل حتي بعد موافقة الداتا فلو لو طولت ما امتحنت وتضطر تسجل من جديد ذيك ذي اي زول ماسجل قبل كدة


لمذيد من التفاصيل شوفو موقعهم وهم بالمناسبة عندهم خدمة شات اربع وعشرين ساعة مجاني ومابيتطلب انك تكون مسجل معاهم يعني هم حاضرين يردو علي كل استفساراتك بس تكتب

اسمك وايميلك وبيفتح واحد من الموظفين يبدا الشات معاك وحقيقة دي خدمة في منتهي الرقي
الشي التاني _وماجديد شديد يعني_ انو تسجيل دبي ممكن يشغلك في ابوظبي والعين والعكس بس بضوابط وفترة زمنية محدده اعتقد برضو التفاصيل متوفرة عندهم
الشي الاهم من ديل انك تخت اعصابك في تلاجة قبل تبدا البروسس بتاعة التسجيلات دي والا حايجيك ضغط وسكر لانو روحم طويللللللللللللة
User avatar
ali22
Sketchy
Sketchy
Posts: 2
Joined: 11 Nov 2012, 10:10
University: Omdurman Islamic University
Degree (College): MBBS
Graduation Year: 2005
Plan \ Working On: MRCP
Speciality: General Medicine
Job Title: SHO (Medical or Resident)
Work Place: ER OF WADI ALDAWASSIER HOSPITAL-KSA
Has thanked: 1 time
Been thanked: 1 time
Contact:

Re: ماهي الخطوات المتبعه للعمل كطبيب بدوله الامارات العربيه

Unread post by ali22 »

نعم حفظ الحقوق لاصحابها الكلام دا جهد شخصى لاخت عزيزه فيجب حفظ الحقوق لاصحابها
These users thanked the author ali22 for the post:
SudaMediCa
Mhmdabdelnour
Few Steps
Few Steps
Posts: 6
Joined: 09 Sep 2013, 13:26
University: Omdurman Islamic University
Degree (College): MBBS
Graduation Year: 2013
Plan \ Working On: MRCS
Working on (2): PLAB
Speciality: General Surgery
Job Title: House Officer (intern)
Work Place: N/A
Has thanked: 0
Been thanked: 3 times
Contact:

Re: ماهي الخطوات المتبعه للعمل كطبيب بدوله الامارات العربيه

Unread post by Mhmdabdelnour »

ياجماااعه العفو
فعلا البوست منقووول من اخت وزميله فاضله بس انا فتشت ومالقيت الموضوع في القروب وقلت انقلو عشان الفائده تعم
والله ولي التوفيق
User avatar
Waleed Fareed
Moderator
Moderator
Posts: 1685
Joined: 25 Jul 2013, 19:04
University: Khartoum University
Degree (College): MBBS
Graduation Year: 2013
Plan \ Working On: SMSB
Speciality: General Medicine
Job Title: Registrar
Work Place: Al-Sha'ab Teaching Hospital - Khartoum - Sudan
Has thanked: 33 times
Been thanked: 21 times
Contact:

Re: ماهي الخطوات المتبعه للعمل كطبيب بدوله الامارات العربيه

Unread post by Waleed Fareed »

جزاك الله خيرا د.محمد
فعلا الموضوع مفيد جدا ومهم ولا مانع أبدا من نقل المواضيع لكن بس لمن تنقل موضوع أكتب في النهاية إنو منقول لحفظ الحقوق
لك الشكر
Image
Post Reply

Return to “Work in Arabian Gulf Countries & NGOs”