Normal House Officer Day

News Feeder
Member
Member
Posts: 32
Joined: 19 Feb 2010, 11:51
University & College: SudaMediCa
Country & City: Khartoum
Graduation Year: 1956
Post-Graduation: Specialized in Serving Sudanese People
Job Title (other): Neews Feeder
Work Place: SudaMediCa
Has thanked: 0
Been thanked: 1 time
Contact:

Normal House Officer Day

Unread post by News Feeder »

كتب د.احمد عبد الرحمن محمد حمد:

المستشفى

مكان لايحبه احد فلا المريض يحبه ولا المرافق ولا حتي العاملين به

المكان الوحيد الذي لاتخطط للذهاب اليه بل تدخله اويدخلونك (علي حسب حالتك طبعا) مكرها

تراودني هذه الافكار وانا اجتاز البوابه مبتسما (لزوم الايتيكيت) وبطريقه آليه اذهب الي عياده الباطنيه فاجد وجوها يعلوها البؤس مكفهره مكتئبه اثر ديوتي عصيب استعيذ بالله والقي التحيه وابادر بالسؤال المعهود:-

انشالله امس الديوتي مريح وماكتستو

اسكت ساي بس كدي شوف العنبر

علي الاقل خلاص انتو ماشين نحن يادوب حنستلم

همهمهمهم

شنو قلت

ولا حاجه نحن ماشين خلاص

نتبادل نظرات الحسد (انا حاسدم عشان ماشين بيوتم وهم حاسديني عشان كنت مرتاح امس) ثم اودعهم واودع السعاده معهم واستعد لمجابهه قدري وادعو الله بالسلامه .

تمر الساعات مابين العنبر والحوادث وبنك الدم والشحده اليوميه والحنك مع المدير الطبي حتي يحين موعد تقرير المصير:-

تنظر الي بكل خبث قبل ان تقول:-

اها الحيجي يسد بالليل الليله منو

انظر حولي لاجد العيون والنظارات واللنسيس مصوبه تجاهي وكلها تردد انت انت انت انت انت

احاول ان اميع الموضوع قائلا:-

انتو العيان بتاع الاستون حصل عليهو شنو

لسه غايتو الاستون صليبين وتردف بخبث اعمق لما تجي بعدين بالليل ممكن تخرجو

اتحاذق قائلا هو موش ......... و ......... جايين بالليل

لالالالالالا انا الليله تعبانه و .......... ماشه معاي

ربنا يكتب السلامه انشالله خلاص انا امشي البيت واجيكم راجع

خلاص بس عليك الله تعال بدري

انشالله

كالعاده اظل انا الضحيه واحس بنفس الاحساس الذي احسسته عندما (اتسيكت في قبولي) اتزكر هنا مقوله اخي الشهيره (عافاه الله ورد غربته) الجابرني علي الطب شنو يبقو علي شغل وقرايه عمري كلو.

اعود الي منزلي (انجدع) في اقرب سرير بعد مااضبط المنبه.

ترن ترن ترن ترن

افيق منزعجا كيف مر الوقت سريعا هكذا لاكتشف انه جرس الباب اتجاهل الصوت املا في مواصله ماتبق لي من النوم المقرر لهذا اليوم وما ان استجمع اطراف نعستي حتي تهزني يد بقوه

احمد احمد قوم في عيان عايزنك ليهو

بنظره خاويه اهز رأسي باستسلام معلنا موافقتي اجرجر ارجلي واحمل سماعتي (الادآه الوحيده التي تثبت اني طبيب) ثم اخرج لاتاكد ان يافطه المنزل لم تبدل ويكتب عليها عياده

كيف يادكتور انشالله ماازعجناك بس جدي ده عندو صداع كده وقلنا نتاكد

لالالالا مافي أي ازعاج سلامتو (صداع يامفتري انا الصداع ده عندي زي الجوع احساس اطبع من الطبيعي)

اخبار الشغل شنو

الحمد لله غايتو الامور ماشه

قالو لي صلحو ليكم مرتباتكم

هههههههه مرتباتنا يعني انت مصنفني بصرف مرتب يعني (نفسي اعرف البيفك الاشاعات المغرضه دي منو)

موش دكتور

والله انتو مغشوشين في الطب ده (الفهم التقليدي السوداني حسب المعادله :- قروش= دكتور)

كيف يعني

خليها بالنيه

خلاص نحن زاتنا وصلنا اتفضل يادكتور





(2)





خرجت مهرولا من ذاك المنزل الموبؤ بداء الشكوي

(اصبرو شويه نشيل نفسي ونتم القصه)

دخلت وفي بالي ان الموضوع ليس الا صداع جد مل الوحده ويريد ان يلفت الانتباه فتفاجاءت بان المنزل كله يريد ان يلفت الانتباه (الله يجازيكم ياناس اسحق والطيب مصطفي) كدي شوف البت دي الليله مااتغدت , عليك الله شوف لي ضغطي ده , عمي ده زمان قبل عشره سنه قرصتو عقرب , لي عشره يوم كده حاسي نفسي ماتمام , عارف اليومين دي المويه كعبه اظن جاتني كلي , انت صحي اسلاك الضغط العالي بتعمل سرطان , يادكتور انفلونزا الخنازير دي شنو , ..............الخ.

خرجت وانا متاكد تماما بعد علاجي لكل تلك المشاكل انني اخاصئي باطنيه وجراحه وعالم في المايكرو ومؤسس لطب المناطق الحاره بل اني ابوقراط نفسه فانا اعلم بالويل الذي ينتظرني لو لم اجيب (كان تاليف ولا جد) واعرف ان القصص تنسج حولي ( والله ود ........ داك شاطر شطاره ناديتو لي راجلي كان بيرجف درب واحد راجلي قام ينطط ( وماالدرب الا جلكوز لزوجها المصاب بنقص سكر الدم)) وكما تنسج القصص تحاك الموامرات ( ماشفتي ياانتي ود ........ داك قال دكتور واخساره الطب ناديتو لي بتي البكريه للولاده قال لي وديها المستشفي ياحليلك يا ........... (دايه شهيره في منطقتنا) لاقرت لا حاجه لكن بي ميه دكتور عينه ده ( وده كلو عشان يوم سمايه ولد ولدا العزمتني ليها كنت ديوتي ومامشيت)

اسرعت استحث الخطي للوصول الي المنزل خافضا راسي ( ليس من باب غض النظر بل من باب لا تشوفني لا اشوفك انا عايز انوم) فاذا بصوت خلفي احمد احمد احمد (تعاملت بمبدأ اضان الحامل طرشاء وده فن قديم في غض السمع) ولكن بأءت كل محاولاتي بالفشل بسبب احد العابرين في الطريق الذي نبهني يااخو الزول داك بكورك ليك اه ماكنت سامعو بس شكرا ليك (الله يخليك للذي ده) استدرت لاواجه قدري مبتسما كالعاده (الابتسامه عباره عن تشكيل يرسم علي الوجه ولا تعبر بالضروره عن نفسيات صاحبها)

كيف اخبارك ياخ طولنا ماشفناك

مشغوليات بس غايتو انتو اخباركم شنو

الحمد لله بس ياخ الناس ديل منتظرينك وانا لميتم ليك للشرح

هو مواعيدم الليله يعني

لا بس امتحاناتم قربت وقلنا نلمهم ليك عشان مابيفهمو الا منك قاعدين منتظرينك اسي

خلاص ارح عليهم

وطبعا لاتفوت علي فطنتكم انو الناس ديل طلاب شهاده سودانيه وبيعملو الحنك ده عشان كل واحد يلاقي حبيبتو في منطقه محايده واضيع انا المسكين (زمان عملنها والتاريخ معروف دايما بيعيد نفسو) اتوكل علي الله واستسلم كالعاده واغير وجهتي صوب مجموعه العشاق الذين يدعون الاجتهاد.

السلام عليكم كيف اخباركم ياشباب

الحمد لله كويسين بخير وعافيه (لازم تكونو كويسين ضاربين الضل والخلط)

القرايه كيف معاكم ( طبعا انا اقصد القرايه بنوعيها الاثنين القرايه القرايه وقرايه الحنك)

ماشه لكن صعبه شويه اليومين دي (الله يجازي مهند البنات يحضرو نور ومستوي الحنك يرتفع ويخرب سوقنا)

بتمشي بس انتو اجتهدو وخلو الفيس بوك والشات وركزوا

همهمات ووكلام تحت تحت بدون اجابه واضحه

خلاص نبداء مشكلتكم شنو اسي

بس حبه حاجات كده في الحراره مافاهمينها

جيبو الكتاب واتلمو (انتو شفتو حراره حليل المقرر القديم وناس فاراداي)

وبعد فواصل من الردح والشرح والعيون المركزه (التركيز لا يرتبط فقط بالمزاكره) والشيل والخت وضعت القلم وانتصبت واقفا معلنا انتهاء الجلسه العاطفيه المغلفه بالعلم

خلاص لحدي هنا المره الجايه نواصل

ليه يادكتور نتم اسي عشان نشوف حاجه تانيه

لا انا شغال الليله راجع تاني المستشفي (الراجل ده شكلو لسه حنكو ماقسم ومحتاج زمن اضافي)

يلا مع السلامه واجتهدو سمعتوني اجتهدو

خرجت مهرولا كالعاده (كاكي لو كان دكتور كان شال ذهبيه العالم من التمارين اليوميه) وهذه المره اعتمد مبدأ لا اري لا اسمع لا اتكلم لا احس وعبر الشوارع الميته وصلت المنزل اخيرا اقتحم البوابه واركض الي السرير لاستعد للجوله الثانيه في المستشفي.



(3)





الرجاء وضع هذه الاشياء عند موظف الاستقبال:-

( السعاده , التفاؤل , المرح , الامل , التفكير, الاحلام )

يافطه لا تكتب علي بوابه المستشفي , بل يحسها كل الهاوس اوفسير عند الدخول

ابتسم ( لزوم الاتيكيت وعلي نفسي طبعا ) واعبر البوابه عائدا للمره الثانيه لاستلام الحوادث وبنفس الحركه الآليه تقودني قدماي الي عياده الباطنيه (فالتفكير عند موظف الاستقبال طبعا) ادخل بسؤالي المعهود

انشالله ماكتستو

الحمد لله الله جابك نحن ماشين والله ماعندنا زمن نسلمك العنبر علي العموم كلو في الفايلات مع السلامه

طيب المديكل وين

طلع الاستراحه وقال ماينادوهو الا لي حاله مكتسه

مع السلامه مع السلامه

اعود مره اخري لمتابعه حلقات المسلسل المكسيكي (الحوادث, اللاب, بنك الدم, المدير الطبي, العنبر)

الساعه 11م

صراخ,نقاله,كميات مهوله من الكوبيشن,اقتحام للعياده

مالا الزوله دي (وانا اجهز السماعه والميزان) ماعارفين كانت كويسه فجأه وقعت

البلص 82 البرجر 120 علي 80 البريسينق ساوند نورمال الهارت ساوند نورمال

عندها سكري لالالالا واتعشت معانا عادي اتناقشت مع زول او حصلت مشكله لالالالا كانت بتتونس معانا عادي بس اتكلمت في التلفون وجات ماطبيعيه ووقعت ( ايوه شاكوش بالتلفون حليل زمنا لمن مافي موبايلات الشاكوش مباشر جاهرا نهارا) خلاص كدي خلو لي زول واحد واطلعو انتو عشان الزحمه ماكويسه ليها وعليك الله جيب لي معاك العلاجات دي (دي ان اس + لازيكس)

(درب بسرعه +لازيكس+زياده المكيف) وكالعاده اللازيكس العجيب يؤتي اكله ومن كانت مغمي عليها تنافس الان بجداره في سباقات الجري

الساعه1ص

*كيف يااحمد اخبارك وكيف امورك *اوووووو ......... كيفكم انشالله طيبين *الحمدلله عندك رقم تلفوناتنا نحنا طالعين الارض المحرره (الاستراحه) كان جا كيس اضرب لينا * بختكم ياناس الجراحه *يازول ده كلامك *خلاص نومو لي معاكم *تمام يلا تصبح علي خير (ناس عايشه وناس دايشه وناس تنوم وناس تحوم)

الساعه 2ص

بدايات النعاس اللذيذ مع هواء الفريون المنعش وبدأت اتخيل الكليرنس والرجوع الي المنزل بعد نظرات الشماته المعتاده التي اوزعها علي اليونت التي تستلم من بعدنا وسرحت مع الفطور و ........... فجأه

رجل تجاوز الخمسين وابنه وابنته وزوجته وبعض الجيران

*مالو الحاج *عندي ابو الشهيق * بس ياحاج مافي حاجه تانيه * لا بس هو *معاك من متين *ربع ساعه كده *عندك كلي ولا كنت بتقح *لالالالا بس ابو الشهيق *طيب جربت تكتم نفسك *لا *كدي اكتم نفسك دقيقه كده

بعد ان غادر الحاج وقبيلته بالسلامه بدأت افكر في ان احدهم قد ارسلهم لي فكل حسابات المنطق لا تقبل ان تهرع قبيله الي المستشفي من اجل السيد ابو الشهيق

الساعه 3ص

سماء زرقاء صافيه ونهر يتدفق في سلاسه مع بعض اصوات العصافير من علي البعد غزال يلاعب صغيره في مرج من الازهار وبعض الفراشات الملونه تتطاير علي الورود الزرقاء انحني لاقطف احداها فإذا بيد غليظه تمسك يدي مع صوت مألوف (قلنا شنو نحن موش قلنا الاحلام دي تختها عند موظف الاستقبال (اسم الدلع لي بتاع النظام العام)) استيقظ منزعجا واستعيذ واستغفر واذداد انزعاجا مع رؤيه نقاله امامها مرشد يقول هنا هنا دخلا هنااشد يدي علي سماعتي واتقدم نحو النقاله *مالو *كان عندو صداع شديد وفجأه بقي يتشنج *امسك امبوله الديازبام واسال عندو ضغط *عندو ضغط وسكري والتشنجات دي بتجيهو طوالي بيدوهو حقنه بيبقي كويس بس الموضوع ده كتر *افرغ الامبوله وانا ممسك بالهاتف تييييييييت تيييييييييت تييييييييت

لايوجد رد تيييييييييت تيييييييييييت تيييييييييييت لايوجد رد اكتفي بهذا القدر واسرع الي الاستراحه ويا.............

متثائبا يرد في شنو * في كيس تحت وعايزك تشوفو * مالو * جامتشنج *مش اديتو ديازبام * ايوه بس دي ماالمره الاولي عندو هستوري لي سميلر كوندشن ونون ديابيتك وهايبرتنسف * كويس بجي

وبعد الجرجره المعتاده تسلم الكيس و.................... (مواضيع طبيه معروفه للجميع)

الساعه 5ص

اهم ميزات مستشفانا (المنسي من وزاره الصحه بقصد او بدون قصد) ثقاله الكوبيشن يعني الواحد راقد مع زول في العنبر يجيك يقول ليك كدي قيس لي الضغط يادكتور انا اصلا راقد مع اخوي وعندي حبه فتور قلت اجي افحص و............

* صباح الخير يادكتور كدي شوف لي ضغطي *عندك ضغط انتي اصلا * بري (لا بشده) بس ساي قلت اشوف *كويس مدي يدك( بالصدفه اجد ماابحث عنه لايبوما كما قال بيلي ان لف) * ياحاجه الورم ده قاعده بيهو مالك * ساي لابيوجعني ولاعامل لي حاجه *لالالا لازم تمشي يشوفو ليك * طيب ماتشوفو انت * لا ده بتاع ناس الجراحه المكتب الجنبنا ده اسي بناديهم ليك (بكل استمتاع اضرب الرقم تيييييييييييت تيييييييييييييت صباح الخير عندكم كيس تعالو)

اخيرا الكليرنس والعوده الي الديار وعلي غير العاده ماعندي كيس استعيد الفرح من موظف الاستقبال واسرع الي المنزل واستلقي علي السرير واعدل المخده و........

قوم في عيان عايزنك ليهو

الجد صداعو ماراح

والعم اكيد العقرب القرصتو قبل عشره سنه لسه بتوجعو

واكيد طلاب الشهاده عايزين يحبو

واكيد واكيد واكيد

ويبقي الحال علي ماهو عليه
Image
Rimah
Few Steps
Few Steps
Posts: 7
Joined: 25 Jun 2010, 21:33
University & College: Upper Nile University/school of medicine
Country & City: Sudan
Graduation Year: 2003
Post-Graduation: Doing step2 ck,planing to apply for residency next year isA.
Job Title (other): Doctor
Work Place: USA,not practicing yet.
Has thanked: 0
Been thanked: 0
Contact:

Re: يوم عادي لهاوس اوفسير عادي

Unread post by Rimah »

Jazak Allah kher,you made me laugh :lol: &remind me with that sweet part of my life.
montasir almobarak
Member
Member
Posts: 27
Joined: 21 Oct 2011, 00:09
University: Juba University
University & College: Juba University, MBBS
Degree (College): MBBS
Graduation Year: 2001
Plan \ Working On: MRCP
Speciality: General Medicine
Job Title: OTHER
Job Title (other): resident
Work Place: KSA
Has thanked: 10 times
Been thanked: 0
Contact:

Re: يوم عادي لهاوس اوفسير عادي

Unread post by montasir almobarak »

Thank you
:mrgreen: :mrgreen: :mrgreen: :mrgreen:
:lol: :lol: :lol:
:D :D :D
almois
Donor
Donor
Posts: 33
Joined: 30 Dec 2011, 16:40
University: Bahr El-Ghazal University
Degree (College): MBBS
Graduation Year: 2005
Plan \ Working On: MRCP
Speciality: General Medicine
Job Title: SHO (Medical or Resident)
Work Place: PHCC -BIADA NATHEEL-Hail-KSA
Has thanked: 16 times
Been thanked: 5 times
Contact:

Re: يوم عادي لهاوس اوفسير عادي

Unread post by almois »

ذكريات الهاوس مان والمعاناة التى مررنا بها
User avatar
rawan
Sketchy
Sketchy
Posts: 0
Joined: 20 Jun 2010, 22:36
University & College: faculty of medicine , university of khartoum
Country & City: khartoum bahry , sudan
Graduation Year: 2010
Post-Graduation: planning to sit for MRCOG part 1 next september
Job Title (other): houseman
Work Place: khartoum hospital
Has thanked: 0
Been thanked: 0
Contact:

Re: يوم عادي لهاوس اوفسير عادي

Unread post by rawan »

ha ha ha, nice
User avatar
becareman
Moderator
Moderator
Posts: 180
Joined: 19 May 2010, 18:41
University: Omdurman Islamic University
Country & City: Omdurman
Degree (College): MBBS
Graduation Year: 1955
Plan \ Working On: ----
Working on (2): ----
Speciality: Anesthesia & ICU
Job Title: Specialist
Work Place: KSA
Has thanked: 5 times
Been thanked: 20 times
Contact:

House Officer Day!

Unread post by becareman »

لو في الخرطوم اعتقد انك اشتغلت في النو... مستشفى النو يمتاز بهذه الميزات من حضور القبائل وابو الشهاق وقام من النوم ببكي ما عارفين مالو دي في البلك.................... هاهاهاهاهاهاا
thank you your story made my day .......................
Image
لكل شيءٍ إذا ما تم نقصانُ **فلا يُغرُّ بطيب العيش إنسانُ
هي الأيامُ كما شاهدتها دُولٌ**مَن سَرَّهُ زَمنٌ ساءَتهُ أزمانُ
**
ألا كل ما خلا الـلـه بـاطـل**وكل نعـيم لا مـحـالة زائل
**
**
وكل امرىء يوماً سيعرف سعيه**إذا حصلت عند الإله الحصائل
نسأل الله التوفيق للجميع في الدارين
[/align]
User avatar
shihabeldabi
Sketchy
Sketchy
Posts: 4
Joined: 05 Jul 2013, 20:44
University: International University of Africa
Degree (College): MBBS
Graduation Year: 2011
Plan \ Working On: MRCP
Working on (2): PLAB
Speciality: Endocrinology
Job Title: SHO (Medical or Resident)
Work Place: Looking for a job in KSA
Has thanked: 1 time
Been thanked: 0
Contact:

Re: Normal House Officer Day

Unread post by shihabeldabi »

hahahahahahahaha.....real hawoosy day :)
User avatar
Faheema Alsharif
Sketchy
Sketchy
Posts: 1
Joined: 21 Dec 2013, 21:35
University: Zaiem Azhari University
Degree (College): MBBS
Graduation Year: 2014
Plan \ Working On: MRCS
Speciality: Neurosurgery
Job Title: Medical Student
Work Place: UNIVERSITY
Has thanked: 0
Been thanked: 0
Contact:

Re: Normal House Officer Day

Unread post by Faheema Alsharif »

ههههه المشكلة انا بضحك هسه بس الكلام دا راجيني قريب دعواتكم وبالتوفيق للجميع
User avatar
dr.elhadi555
Contributor
Contributor
Posts: 347
Joined: 29 Nov 2013, 15:13
University: Omdurman Islamic University
Degree (College): MBBS
Graduation Year: 2011
Post-Graduation: Collegiate Membeship (MRCPI) / MRCPUK 1 and 2,
Plan \ Working On: UK S.T
Working on (2): Ireland S.T
Speciality: General Medicine
Job Title: SHO (Medical or Resident)
Work Place: KSA
Location: KSA
Has thanked: 2 times
Been thanked: 3 times
Contact:

Re: Normal House Officer Day

Unread post by dr.elhadi555 »

hhhhhhh...really houseman period is v.painful esp- in the presence of aggressive registrar ..but thank god it passed safely :D
Image[/url]
Post Reply

Return to “Break Time”